Shango
11.06.2007, 14:02
G8 - Geb Acht!
War des e Woch, die jetzert hinner uns liecht, määnen ehr net ach? Die Berichterstattung vum G8-Gipfel im Fernseh war jo Unnerhaltung in beschter Hollywood-Manier. Zwischezeitlich isses sogar so gewässt, dass mer praktisch gar nimmie zum Atem hole kumme is, so spannend war’s. Schließlich hot sich des, was in Heilichedamm die Woch gebote worre is, hinner kämme noch so guude James-Bond-Film verstecke misse: Spannende Verfolchungsjachde zu Wasser un in de Luft, nervezerreißende Zweikämpfe uff Lewe un Tod un inmitte vun dem Ganze unser Kanzlerin Angela Merkel als taffes Bond-Girl im Kampf geche de ultimative Bösewicht un Welteverdrecker Dschordsch Dabbeljuu. Norre ääns hot g’fehlt, nämlich es Häppie End, wenn die Angela un de Dschordsch in emme klääne Schlauchboot in de Sunneunnergang entschwinden…
So g’sehe waren die Koschte fer den G8-Gipfel doch gar net so iwwermäßich hoch wie vun viele behauptet, schließlich koscht heitzudaach in Hollywood en guude Film ach en dreischtelliche Millione-Betraach. Un im Kino hot sich noch känner driwwer beschwert, dass die Produktionskoschde zu hoch wären, do wollen alle norre gut unnerhalte wärre…
Awwer abgsehe dodevu kann wohl niemand mit de Ergebnisse vun dem Gipfel so recht zufriede soi. In Sache Klimaerwärmung hot’s norre en wachsweiche Kompromiss gewwe, un wie mer des so vun unsre Politiker gewohnt is, wärd uns ach des noch als en Erfolg verkaaft. Schließlich dut mer laut Abschlussbericht zumindescht in Erwägung ziehe, die Welt zu rette. Na dann…
Mer zumindescht sinn froh, wenn mer niemols so en G8-Gipfel in de Palz ausrichte missen. Sollt’s doch mol so weit kumme, dann wannern mer fer die äänd Woch ins Saarland aus. Un des soll schunn was hääße.
Quelle: Palz Poscht 10/2007
War des e Woch, die jetzert hinner uns liecht, määnen ehr net ach? Die Berichterstattung vum G8-Gipfel im Fernseh war jo Unnerhaltung in beschter Hollywood-Manier. Zwischezeitlich isses sogar so gewässt, dass mer praktisch gar nimmie zum Atem hole kumme is, so spannend war’s. Schließlich hot sich des, was in Heilichedamm die Woch gebote worre is, hinner kämme noch so guude James-Bond-Film verstecke misse: Spannende Verfolchungsjachde zu Wasser un in de Luft, nervezerreißende Zweikämpfe uff Lewe un Tod un inmitte vun dem Ganze unser Kanzlerin Angela Merkel als taffes Bond-Girl im Kampf geche de ultimative Bösewicht un Welteverdrecker Dschordsch Dabbeljuu. Norre ääns hot g’fehlt, nämlich es Häppie End, wenn die Angela un de Dschordsch in emme klääne Schlauchboot in de Sunneunnergang entschwinden…
So g’sehe waren die Koschte fer den G8-Gipfel doch gar net so iwwermäßich hoch wie vun viele behauptet, schließlich koscht heitzudaach in Hollywood en guude Film ach en dreischtelliche Millione-Betraach. Un im Kino hot sich noch känner driwwer beschwert, dass die Produktionskoschde zu hoch wären, do wollen alle norre gut unnerhalte wärre…
Awwer abgsehe dodevu kann wohl niemand mit de Ergebnisse vun dem Gipfel so recht zufriede soi. In Sache Klimaerwärmung hot’s norre en wachsweiche Kompromiss gewwe, un wie mer des so vun unsre Politiker gewohnt is, wärd uns ach des noch als en Erfolg verkaaft. Schließlich dut mer laut Abschlussbericht zumindescht in Erwägung ziehe, die Welt zu rette. Na dann…
Mer zumindescht sinn froh, wenn mer niemols so en G8-Gipfel in de Palz ausrichte missen. Sollt’s doch mol so weit kumme, dann wannern mer fer die äänd Woch ins Saarland aus. Un des soll schunn was hääße.
Quelle: Palz Poscht 10/2007